ប្រធានាធិបតី សហរដ្ឋអាមេរិកលោក បារ៉ាក់ អូបាម៉ា ប្រកាសដឹកនាំយុទ្ធនាការពិភពលោកថ្កោលទោសការសម្លាប់នៅក្នុងទីក្រុងបារីសនៃប្រទេសបារាំង ហើយប្តេជ្ញាស្វែងរកអ្នកជាប់ពាក់ព័ន្ធការវាយប្រហារនោះឲ្យឃើញ។
ការបាញ់ប្រហារ ការបំផ្ទុះគ្រាប់បែក និង ការចាប់ចំណាត់ខ្មាំងនៅកន្លែងប្រគំតន្ត្រីមួយនៅក្នុងប្រទេសបារាំងធ្វើឲ្យមានការថ្កោលទោសពេញពិភពលោក ពិសេសមាន អាមេរិក អង់គ្លេស និង អេស្ប៉ាញជាដើម ប្រកាសសហការជាមួយបារាំងក្នុងការស្វែងរកជនបង្កនេះ។
លោក អូបាម៉ា ថ្លែងនៅសេតវិមានថា ការវាយប្រហារនេះ មិនមែនតែលើប្រជាជនបារាំងទេ គឺវាជាការវាយប្រហារលើមនុស្សគ្រប់គ្នាលើពិភពលោក។ លោកបញ្ជាក់ថា លោកនឹងធ្វើអ្វីមួយ ដោយសហការជាមួយបារាំង និងជាមួយប្រជាជាតិផ្សេងៗទៀតនៅលើពិភពលោក ដើម្បីស្វែងរកក្រុមវាយប្រហារទាំងនោះមកផ្តន្ទាទោសតាមច្បាប់។ នេះ បើតាមសារព័ត៌មាន Channel News Asia។
នៅក្រុងឡុងនៃប្រទេសអង់គ្លេស ធ្លាប់មានការវាយប្រហារកាលពីឆ្នាំ២០០៥ នៅកន្លែងធ្វើដំណើរសាធារណៈសម្លាប់មនុស្សអស់៥២នាក់ និង រាប់រយនាក់ទៀតរងរបួស។ នាយករដ្ឋមន្ត្រីអង់គ្លេសលោក ដេវីត កាម៉ារ៉ូន ថ្លែងថា លោក នឹងសហការជាមួយបារាំងតាមអ្វីដែលលោកអាចធ្វើបាន។
នាយករដ្ឋមន្ត្រី អេស្ប៉ាញ លោក ម៉ារីណូ រ៉ាចូ បានអំពាវនាវឲ្យបារាំង សហការជាមួយរដ្ឋមន្ត្រីការបរទេសរបស់លោក ធ្វើការរួមគ្នាក្នុងការស្វែងរកក្រុមវាយប្រហារនោះ។
ក្រៅពីនេះ ក៏មានប្រទេសផ្សេងៗទៀត ប្រកាសសហការជាមួយបារាំង ដើម្បីស្វែងរកក្រុមវាយប្រហារដែរ។ ព្រឹតិ្តការណ៍វាយប្រហារ នៅ៥ទៅ៦កន្លែងផ្សេងៗគ្នា នៅកណ្តាលទីក្រុងបារីសកាលពីម្សិលមិញ បានសម្លាប់មនុស្សអស់ជាង១៥០នាក់ និង ជាច្រើនទៀតរបួស៕
0 comments:
Post a Comment