ការពិតមិនមែនលេងសើច!! ISIS អាចនឹងមានមូលដ្ឋាននៅអាស៊ីអាគ្នេយ៍ក្នុងពេលឆាប់ៗខាងមុខ ក្រុមអង្គការរដ្ឋឥស្លាម ISIS ប្រហែលជាអាចដាក់មូលដ្ឋានប្រចាំតំបន់អាស៊ីអាគ្នេយ៍មួយ ក្រោយភេរវកម្មនាទីក្រុងប៉ារីសបានបិទបញ្ចប់ទៅ ដោយពួកសកម្មជនប្រយុទ្ធមានប្រភពចេញពីប្រទេសម៉ាឡេស៊ីកំពុងតែមានគម្រោងការប្រមែប្រមូលក្រុមជ្រុលនិយមទាំងឡាយនៅប្រទេសជិតខាងឲ្យមកផ្ដុំគ្នា រួចបង្កើតជាក្រុមផ្លូវការមួយ ។ យោងតាមសារព័ត៌មាន Straitime បានប្រាប់ឲ្យដឹងថា សកម្មជនមួយក្រុមដែលស្ថិតក្រោមការតាមចាប់ខ្លួនរបស់អាជ្ញាធរម៉ាឡេស៊ីកំពុងតែលាក់ខ្លួននៅភាគខាងត្បូងប្រទេសហ្វីលីពីន ហើយក្រុមនេះកំពុងតែប្រកូកប្រកាសរកគ្នាមកពីប្រទេសផ្សេងៗដូចជា ម៉ាឡេស៊ី ហ្វីលីពីន និងឥណ្ឌូណេស៊ី ព្រមទាំងក្រុមប្រដាប់អាវុធ Abu Sayyaf និង Jemaah Islamiah ផងដែរ ដោយសព្វថ្ងៃក្រុមទាំង២នេះបានពង្រាយគ្នាស្ទើរពាសពេញអាស៊ីអាគ្នេយ៍ ។
មនុស្សជាច្រើនត្រូវបានគេសង្ស័យថាមានពាក់ព័ន្ធនឹងការប្រកូកប្រកាសរកគ្នានេះ ដោយក្នុងនោះមានអតីតបុគ្គលិកក្រុមប្រឹក្សាក្នុងតំបន់ លោក Muhammad Joraimee Awang Raimee ម្ចាស់ហាងទំនិញ លោក Mohd Najib Husen និងអតីតសាស្ត្រាចារ្យសកលវិទ្យាល័យ Malaya លោក Mahmud Ahmad ។ ក្នុងតួនាទីជាសាស្ត្រាចារ្យសកលវិទ្យាល័យ និងជាអ្នកធ្លាប់ទទួលបានការហ្វឹកហាត់ពីក្រុម Al-Qaeda នៅអាហ្វហ្គានីស្ថាននាចុងទសវត្ស៩០ផងនោះ សាស្ត្រាចារ្យរូបនេះបានប្រើឋានៈរបស់ខ្លួនក្នុងការបញ្ចុះបញ្ចូលឲ្យសិស្ស និស្សិតស្ម័គ្រចិត្តចូលបម្រើឲ្យក្រុមរបស់គេ ។ តែបើសិនជាក្រុមនេះចង់បង្កើតជាសាខារបស់ក្រុមជ្រុលនិយម ISIS មែន មេដឹកនាំក្រុមនេះចាំបាច់ត្រូវតែទៅស្បថស្បែចំពោះមុខមេដឹកនាំធំបំផុតរបស់ ISIS លោក Abu Bakr al-Baghdadi ដើម្បីបង្ហាញពីចិត្តស្មោះរបស់គេ ។
0 comments:
Post a Comment