ក្រោយហេតុការណ៍នៅទីក្រុងប៉ារីសបានកើតឡើង វាបានទាក់យកចំណាប់អារម្មណ៍ពីពិភពលោកស្ទើរតែទាំងមូល ខណៈមុននេះមួយថ្ងៃនៅប្រទេសលីបង់ក៏មានហេតុការណ៍បំផ្ទុះគ្រាប់បែកប៉ុន្មានគ្រាប់ដែរ ប៉ុន្តែមិនសូវមានអ្នកចាប់អារម្មណ៍ប៉ុន្មានទេ តែអ្វីដែលពិភពលោកគួរតែចាប់អារម្មណ៍ខ្លាំងទៅលើហេតុការណ៍នៅលីបង់នោះគឺ វីរភាពដ៏ក្លាហានរបស់បុរសកូន២ម្នាក់ ។ យោងតាមប្រភពសារព័ត៌មាន Independent បានឲ្យដឹងថា គ្រាប់បែក២គ្រាប់បានបំផ្ទុះនៅទីក្រុងបេរូត (Beirut) ប្រទេសលីបង់ដោយវាបានសម្លាប់មនុស្សអស់៤៤នាក់ និងធ្វើឲ្យមនុស្សច្រើនជាង២០០នាក់ផ្សេងទៀតរងគ្រោះ ប៉ុន្តែចំនួនអ្នកស្លាប់គួរតែមានច្រើនជាងនេះបើសិនជាពេលបំផ្ទុះគ្រាប់បែកអត្តឃាតនោះមិនមានបុរសឈ្មោះ Adel Termos នៅកន្លែងកើតហេតុ ។ លោក Adel Termos គឺជាវីរបុរសម្នាក់ចំពោះប្រជាជនលីបង់ជាច្រើនដោយសារអ្នកទាំងនោះអាចរួចជីវិតបានក៏ដោយសារលោកដែរ ព្រោះលោកជាបុរសដ៏ក្លាហានម្នាក់ដែលហ៊ានលះបង់ជីវិតខ្លួនឯងក្នុងគោលបំណងការពារជីវិតមនុស្សជាច្រើនឯទៀត ។
ក្រោយពេលមានការបំផ្ទុះគ្រាប់បែកអត្តឃាតមួយបានកើតឡើងហើយ លោក Adel Termos បានឃើញអ្នកបំផ្ទុះគ្រាប់បែកអត្តឃាតម្នាក់ទៀតពាក់គ្រាប់បែកនៅនឹងខ្លួនហើយបម្រុងចូលមកបំផ្ទុះមួយគ្រាប់ទៀត ប៉ុន្តែគ្រាន់តែលោកឃើញភ្លាម លោកបានរត់ទៅបំបុកផ្ដួលលើដីតែម្ដងធ្វើឲ្យគ្រាប់បែកផ្ទុះមុនពេលកំណត់ ជាហេតុធ្វើឲ្យមនុស្សស្លាប់អស់តែ២នាក់ប៉ុណ្ណោះ ម្នាក់ជារូបលោកផ្ទាល់ និងម្នាក់ទៀតជាអ្នកបំផ្ទុះគ្រាប់បែកអត្តឃាត ។ វីរភាពរបស់លោកបានដក់នៅក្នុងដួងចិត្តរបស់ប្រជាជនលីបង់ស្ទើរតែទាំងមូល ។ ភាពក្លាហាន និងហ៊ានលះបង់ដើម្បីអ្នកដទៃមួយនេះបានធ្វើឲ្យលោកក្លាយជាវីរបុរសមួយរូបដែលទទួលបានការគោរពយ៉ាងខ្លាំងពីសំណាក់ប្រជាជនទូទៅ ។ គួរបញ្ជាក់ផងដែរថា ក្នុងពេលកើតហេតុ Adel Termos គ្រាន់តែជាជនសាមញ្ញម្នាក់ដែលដើរផ្សាលេងជាមួយកូនស្រីប៉ុណ្ណោះ ហើយបើសិនជាលោកមានចេតនាចង់រត់ចេញពីហ្វូងមនុស្សក្នុងពេលដែលលោកឃើញអ្នកបំផ្ទុះគ្រាប់បែកអត្តឃាតនោះក៏ប្រហែលជាអាចទាន់ពេលដែរ ព្រោះលោកឃើញបុរសម្នាក់នោះមុនគេ ។
0 comments:
Post a Comment